സമര്‍പ്പണം: അമ്മയ്ക്ക്

സമര്‍പ്പണം:  അമ്മയ്ക്ക് 

കാരുണ്യദീപം

കൃപയാലുരുവായ കാരുണ്യദീപം
ഹൃദയാലുത്വമാം മാതൃഭാവം
കൈനീട്ടിപ്പുണരും കൈവല്യനിലയം
തത്ത്വ സ്വരൂപത്തിൻ പ്രത്യക്ഷഭാവം

അമ്മാ.. അനാദ്യന്തവെണ്മ
ആ മടിയിൽ എല്ലാരുമൊന്നെന്ന ഉണ്മ
അമ്മിഞ്ഞപ്പാലുപോൽ നിർമ്മലസ്നേഹം
കൊണ്ടുള്ളം തണുപ്പിക്കുമമ്മ

അമൃതസമാനമാം വാക്കിന്‍റെ തേൻ തുള്ളി
അകതാരിലിറ്റിക്കുമമ്മ – അമ്മ
അമൃതാനന്ദമാം സാന്ദ്രാനന്ദത്തിൻ
അതിരുകളില്ലാത്ത കോവിൽ... അമ്മ
അതിരുകളില്ലാത്ത കോവിൽ

അമ്മാ.. അനാദ്യന്തവെണ്മ
അവിടെയെല്ലാരുമൊന്നെന്ന ഉണ്മ
ആടിയുലയുമെൻ മനസ്സിലെ തിരിനാളം
നേരേ തെളിക്കുന്നതമ്മ
ധ്യാന സപര്യയ്ക്കു വഴികാട്ടിയായെന്‍റെ
മുൻപേ നടക്കുന്നതമ്മ

ആ ദുഗ്ദ്ധമൊന്നു മുകർന്നാൽപ്പിന്നെ
ആനന്ദമമൃതാക്കുമമ്മ- അമ്മ
അമൃതാനന്ദമാം സാന്ദ്രാനന്ദത്തിൻ
അതിരുകളില്ലാത്ത കോവിൽ... അമ്മ
അതിരുകളില്ലാത്ത കോവിൽ

സുകുമാര്‍