ദിവസം 211. ശ്രീമദ്‌ ദേവീഭാഗവതം. 8. 13. ക്രൗഞ്ചദ്വീപാദി വർണ്ണനം

ദിവസം 211. ശ്രീമദ്‌ ദേവീഭാഗവതം. 8. 13. ക്രൗഞ്ചദ്വീപാദി വർണ്ണനം

ശിഷ്ട ദ്വീപ പ്രമാണം ച വദ സര്‍വ്വാര്‍ത്ഥ ദര്‍ശന
യേന വിജ്ഞാതമാത്രേണ പരമാനന്ദമയോ ഭവേത്
കുശദ്വീപസ്യ പരിതോ ഘൃതോദാവരണം മഹത്
അതോ ബഹി:ക്രൌഞ്ചദ്വീപോ ദ്വിഗുണ:സ്യാത് സ്വമാനത:

നാരദൻ പറഞ്ഞു. 'സർവ്വജ്ഞനായ ഭവാൻ ബാക്കിയുള്ള ദ്വീപുകളെപ്പറ്റിയും ഞങ്ങൾക്ക് പറഞ്ഞു തന്നാലും.'

ശ്രീ നാരായണൻ തുടർന്നു: 'കുശദ്വീപിനെ ചൂഴ്ന്നു കിടക്കുന്ന നെയ് സമുദ്രത്തിനപ്പുറം ഇരട്ടി വലുപ്പത്തിൽ ക്രൗഞ്ചദ്വീപാണ് ഉള്ളത്. ക്രൗഞ്ചദ്വീപിനു ചുറ്റും പാൽക്കടൽ. ക്രൗഞ്ചപർവ്വതം നിൽക്കുന്ന ദ്വീപായതിനാലാണ് ഇതിനു ക്രൌഞ്ചദ്വീപ് എന്ന പേരുണ്ടായത്.

പണ്ടു് ശ്രീഗുഹന്റെ വേലു കൊണ്ട് ക്രൗഞ്ചഗിരിയുടെ ഉദരം പിളർന്നു പോയി. എന്നാൽ വരുണൻ പാൽക്കടലിലെ ജലം കൊണ്ട് കഴുകി ആ മലയെ കാത്തു രക്ഷിച്ചു. പ്രിയവ്രതപുത്രനായ ഘൃതപൃഷ്ഠനാണ് ദ്വീപിന്റെ അധിപൻ. അദ്ദേഹം ദ്വീപിനെ ഏഴായി വിഭജിച്ചു മക്കളെ ഭരിക്കാൻ ഏല്പിച്ച ശേഷകാലം യോഗനിരതനായി ജീവിച്ച് ഒടുവിൽ ഭഗവദ് പദമണഞ്ഞു.

ആമം, മധുരൂഹം, മേഘപൃഷ്ഠം, സുധാമകം, ഭ്രാജിഷ്ഠം, ലോഹിതാർണ്ണം, വനസ്പതി എന്നിവയാണ് ആ ഏഴു ഭൂവിഭാഗങ്ങൾ. അവിടങ്ങളിലെ സപ്തഗിരികൾ ശുക്ളം, വർദ്ധമാനം, ഭോജനം, ഉപബർഹണം, നന്ദം, നന്ദനം, സർവ്വതോഭദ്രം എന്നീ പേരുകളിൽ അറിയപ്പെടുന്നു. അവിടെയുള്ള ഏഴു നദികൾ അഭയാ, അമൃതൗഘാ, ആര്യകാ, തീർത്ഥവതി,വൃത്തിരൂപവതി, ശുക്ളാ, പവിത്രവതികാ എന്നിവയാണ്.

ഇവിടെ ജീവിക്കുന്ന ഋഷഭൻ, പുരുഷൻ, ദ്രവിണൻ, ദേവകാഭിധൻ എന്നീ നാലുവർണ്ണത്തിൽ പെടുന്ന മനുഷ്യരും ഈ നദികളെയാണ് ജീവസന്ധാരണത്തിനായി ആശ്രയിക്കുന്നത്.

"ഭൂl, ഭുവര്‍ലോകം, സ്വര്‍ലോകം' എന്നവയെ പവിത്രമാക്കിത്തീർക്കുന്ന നദികളേ, ഈശ്വരചൈതന്യവാഹകരേ, നിങ്ങളെ സ്പർശിക്കുന്ന ഞങ്ങൾ ഓരോരുത്തരിലെയും പാപങ്ങൾ തീർത്തു തന്നാലും" എന്നവർ വരുണ ദേവനെ സ്തുതിക്കുന്നു.

പാൽക്കടലിനുമപ്പുറമാണ് വിഖ്യാതമായ ശാകദ്വീപം. മുപ്പത്തിരണ്ടു ലക്ഷം യോജനയാണ് അതിന്റെ വിസ്തീർണ്ണം. ദ്വീപിലുള്ള ശാകവൃക്ഷം മൂലമാണ് ശാകദ്വീപം എന്ന പേരതിനു വന്നത്. ,അതിനു ചുറ്റും ദധിസമുദ്രമാണ്. പ്രിയവ്രതപുത്രനായ മേധാതിഥിയാണ് ഈ ദ്വീപിന് അധിപൻ. സ്വയം യോഗഗതി പൂകുന്നതിനു മുൻപ് അദ്ദേഹം ദ്വീപിനെ ഏഴാക്കിത്തിരിച്ച് ഏഴു മക്കളെ അവയുടെ അധിപരാക്കി.

പുരോജവം, മനോജവം, പവമാനം, ധൂമ്രാനീകം, ചിത്രരേഫം, ബഹുരൂപം, വിശ്വധൃക് എന്നിവയാണാ വർഷങ്ങൾ. അവിടെയുള്ള ഏഴ് അതിർത്തി പർവ്വതങ്ങളും ഏഴ് നദികളും വളരെ പ്രശസ്തങ്ങളാണ്. ഈശാനം, ഊരു ശൃംഗം, ബലഭദ്രം, ശതകേസരം, സഹസ്രസ്രോതകം, ദേവപാലം, മഹാശനം എന്നിങ്ങിനെയാണ് ആ ഗിരിനാമങ്ങൾ. നദികൾ, അനഘാ, ആയുർദാ, ഉഭയസൃഷ്ടി, അപരാജിതാ, പഞ്ചപദി, സഹസ്രശ്രുതി, നിജധൃതി എന്നിവയാണ്.

സത്യവ്രതർ, ക്രതുവ്രതർ, ദാനവ്രതർ, അനുവ്രതർ എന്നീ നാലു ജാതി മനുഷ്യർ അവിടെ വാഴുന്നു. പ്രാണായാമം ചെയ്ത് പരമപുരുഷനായ ശ്രീ ഹരിയെ അവർ ഭജിക്കുന്നു. "സകലജീവികൾക്കുള്ളിലും പ്രാണവായുവായി നിലകൊണ്ടു് അവരെ ചൈതന്യവത്താക്കുന്നവനും ജഗത്തിനെ നിയന്ത്രിക്കുന്നവനുമായ ഭഗവാൻ ഞങ്ങളെ കാക്കുമാറാകട്ടെ" എന്നാണവരുടെ പ്രാർത്ഥന.

ദധിസമുദ്രത്തിനപ്പുറം ശാകദ്വീപിന്റെ ഇരട്ടി വലുപ്പമുള്ള പുഷ്കരദ്വീപ് നിലകൊള്ളുന്നു. അതിനു ചുറ്റും ശുദ്ധജലം നിറഞ്ഞ സമുദ്രമാണ്. അവിടെ പത്തുകോടി സ്വർണ്ണദളങ്ങൾ വിതാനിച്ച് അഗ്നിജ്വാലപോലെ പ്രോജ്വലിച്ചു വിളങ്ങുന്ന ഒരു ദിവ്യ താമരയുണ്ട്. ഭൂലോകസൃഷ്ടിക്കായി ലോകഗുരുവായ ഭഗവാൻ സ്വയം നിർമ്മിച്ച ഇരിപ്പിടമാണത്.

ഇവിടെ ഈ ദ്വീപിനെ അപ്പുറമെന്നും, ഇപ്പുറമെന്നും തിരിക്കുന്ന മാനസോത്തരം എന്ന പേരുള്ള ഒരു പർവ്വതമുണ്ട്. പതിനായിരം യോജന വിസ്തൃതിയും ഉയരവും ഉണ്ടതിന്. ഇന്ദ്രാദി ലോകപാലൻമാർക്ക് വേണ്ടിയുള്ള നാലു നഗരങ്ങൾ നാലു ദിക്കുകളിലായി ഇതില്‍ ലകൊള്ളുന്നു. അവയ്ക്കും മുകളിലാണ് രണ്ടു് അയനങ്ങളിലായി ആദിത്യന്റെ പ്രദക്ഷിണം നടക്കുന്നത്.

പ്രിയവ്രതപുത്രനായ വീതിഹോത്രൻ ഈ ദ്വീപിനെ രമണം, ധാതകി എന്നീ രണ്ട് വർഷങ്ങളാക്കി തിരിച്ചു തന്റെ രണ്ടു പുത്രൻമാരെ ഏല്പിച്ചു. പൂർവ്വികർ ചെയ്തിരുന്നതു പോലെ ഈ വർഷപാലകൻമാരും യോഗവിധിപ്രകാരം ബ്രഹ്മസ്വരൂപിയായ പരമേശ്വരന്‍റെ ലിംഗത്തെ പൂജിക്കുന്നു. കർമഫല രൂപിയും  ഏകാന്തവും അദ്വയവും പ്രശാന്തവുമായ ബ്രഹ്മലിംഗത്തെയാണവർ നിത്യവും തൊഴുതു പൂജിക്കുന്നത്.